Guðrún Angantýsdóttir

2003-05-25T07:34:00.000-07:00

Sæl.
Loksins er ég búin að ljúka lokaverkefni mínu. Nú get ég farið út í sólskinið og notið sumarsins.
Þetta námskeið hefur verið mjög skemmtilegt og hef ég lært mikið á ýmiss tölvuforrit í vetur. Þetta námskeið hefur opnað dyr að nýjum heimi þar sem ég sé óteljandi möguleika fyrir kennara.
Ég hef einnig kynnst mjög skemmtilegu og hæfileikaríku fólki á námskeiðinu og þakka kærlega fyrir ánægjulegar samverustundir. Vonandi eigum við eftir að kynnast betur í framtíðinni og hugsanlega vinna eitthvað saman.
Ég þakka fyrir mig.
Kær kveðja, Guðrún.

2003-05-14T13:48:00.000-07:00

Sæl.
Ég er búin í prófum og byrjuð að vinna að lokaverkefni mínu. Ég hef verið dugleg í dag að laga vefinn og ætla að ljúka við verkefni nemenda á morgun. Ég næ ekki að ljúka vefnum á réttum tíma, en ætla að reyna að komast mjög langt fyrir vikulok. Ég er að fara til Englands um næstu hlegi og tek mér því frí frá laugardegi til þriðjudags. Ég stefni að því að ljúka námskeiðinu í lok næstu viku.
Kveðja, Guðrún

2003-05-07T15:11:00.000-07:00

Sæl
Í dag hef ég setið við tölvuna og unnið að vefnum mínum. Nú er lokaverkefnið að fá einhverja heildarmynd. Ég er í miðjum prófum en ákvað að hvíla mig í dag í próflestir og vinna vefinn. Nú annars er lítið að frétta. Ég tel niður dagana og er farin að hlakka mikið til að komast í sumarfrí. Reyndar byrjaði ég á sumarnámskeiði um síðustu helgi í námskrágerð. Ég held að það verði skemmtilegt námskeið. Það voru góðar umræður og vangaveltur í staðbundnu lotunni og lofar áframhaldið góðu.
Kveð að sinni, Guðrún.

2003-04-29T02:55:00.000-07:00

Sæl
Enn settist ég fyrir framan tölvuna í stað þess að lesa undir próf og bætti við verkefni mitt um Tölvuforrit í stærðfræðikennslu. Viðbótin er bakgrunnur vefsins. Hér reyni ég að fjalla um þær kenningar sem liggja að baki tölvuforrita sem finna má í dag á Netinu og ætla ég síðan að fara að búa til verkefni. Sjálf er ég hrifin að samvinnunámi, því verð ég með einhvern vefleiðangur, en einnig ætla ég að venda á góða vefi eins og verf Freudenthalstofnunnar og bandarísku stærðfræðikennarasamtakanna NCTM. Einnig hef ég reynsu af að kenna í anda hugsmiðakenningar og er mjög gaman að vinna með þrautalausnir í hópvinnu. Það er hægt að gera skemmtileg verkefni með nemendum þar sem stuðst er við góða kennsluvefi. Ég hlakka mikið til að geta byrjað á verkefnunum og er alltaf að hugsa um og skipuleggja verkefni. En nú verð ég að fara að læra fyrir próf.
Kveð að sinni, Guðrún.

2003-04-26T14:18:00.000-07:00

Sæl
Ég hef setið yfir tölvunni í dag og byrjað að vinna í lokaverkefni mínu. Hér má finna það sem ég hef verið að fást við í dag Tölvuforrit í stærðfræðikennslu.
Næstu viku mun ég að öllum líkindum ekki vinna meira í vefnum, en ef ég finn stund milli próflesturs mun ég reyna að gera meira. Ég er að fá skýrari mynd af því hvernig vefurinn kemur til með að vera. Í kaflanum bakgrunnur ætla ég að vera með hugmyndafræði námsefnisins og fjalla um hugsmíðikenningar og tölvustutt samvinnunám. Verkefnin verða 7 - 9 og verða jafnframt kennsluleiðbeiningar til kennara með hverju verkefni.
Þetta eru hugmyndirnar í grófum dráttum, en sjálfsagt á verkefnið eftir að breytast þegar ég fer að vinna í því af fullum þunga.
Það er því skemmtilegur tími framundan.
Kveðja, Guðrún.

2003-04-24T12:50:00.000-07:00

Gleðilegt sumar
Þá er veturinn liðinn og sumarið komið. Mikið hlakka ég til að komast í sumarfrí. Nú um næstu hlegi ætla ég að fara að vinna í lokaverkefninu. Ég er aðeins byrjuð að setja upp vefinn og ætla að hafa svipað form á honum og nýjustu síðunum mínum. Það gerir alla vinnu auðveldari.
Annars sit ég yfir stærðfræðigreiningu alla daga og eftir helgi byrja ég að undirbúa mig undir 4 tíma próf í megindlegri aðferðarfræði.
Kveð að sinni, Guðrún.

2003-04-22T01:24:00.000-07:00

Sæl
Þá eru páskarnir búnir og framundan vinnutörn. Ég hef lítið unnið að vefsíðugerð um páskana. Ég fékk flensu og er ekki enn búin að ná mér. Nú þarf ég að fara að snúa mér að náminu aftur.
Ég hef verið að hugsa um vefinn og er búin að sjá hann fyrir mér. Þá er bara að setjast niður og koma hugmyndunum á skipulagt form.
Kveð að sinni, Guðrún.

2003-04-15T14:53:00.000-07:00

Sæl.
Ég hef verið að búa til námskeiðslýsingu í dag. Ég valdi að hanna námskeið um forritið Paint. Ég var búin áður að semja eitt kennsluverkefni sem á að vera 5. verkefni í námskeiðinu. Um páskana ætla ég síðan að fara að vinna að lokaverkefninu og ef ég hef tíma þá hef ég áhuga á að laga persónuvefinn. Hann mætir afgangi, því ég þarf að fara að læra undir próf.
Mér finnst mjög skemmtilegt að hanna svona námskeið og get vel hugsað mér að ljúka við að fullmóta þetta námskeið í Paint, sem á að samþætta íslensku, stærðfræði og myndmennt, en það verður að bíða fram á sumar.
Kveð að sinni, Guðrún.

2003-04-13T15:07:00.000-07:00

Sæl
Ég er hálf þreytt eftir staðbundnulotuna. Mér fannst dagurinn í gær mjög gagnlegur og lærði ég margt þar. Í dag hef ég síðan verið að prófa mig áfram og er búin að hanna skilasíðu og dæmi um verkefni í Paint. Ég hef einnig verið að skipuleggja námskeið og ætla að reyna að ljúka því á morgun eða þriðjudaginn.
Ég er búin að ákveða að eyða páskadögunum í að laga persónuvefinn og gera hann stílhreinni.
Kveð að sinni, Guðrún.

2003-04-07T14:47:00.000-07:00

Sæl
Þá er fyrirlesturinn um námsmat tilbúinn. Hann er orðinn nokkuð langur. Ég þarf að koma svo mörgum atriðum að. Vonandi er það í lagi. Aðalnámskrá grunnskóla, stærðfræðihluti gerir nefnilega ráð fyrir fjölbreyttum námsmatsleiðum og því tel ég nauðsynlegt að kennarar tileinki sér þær sem fyrst.
Nú er ég farin að forgangsraða verkefnum og stefni að því að ljúka við kennsluleiðbeiningar í Geisla 2 á morgun. Þá er það frá í bili og hægt að snúa sér að fullu að náminu og verkefnum í megindlegri aðferðarfræði áður en ég helli mér út í lokaverkefnið.
Mér finnst ég vera orðin nokkuð lúin eftir átök í námi í vetur og er ég farin að hlakka til prófloka og sumarfrís, þ.e.a.s. ef ég fæ sumarfrí . Ég þarf nefnilega að vinna upp gamlar syndir þ.e. búa til vinnuspjöld fyrir Geisla 2 og 3. Einnig þarf ég að semja tvö þemahefti fyrir haustið. Jæja, þetta tekur nú samt allt enda.
Kveð að sinni, Guðrún.

2003-04-05T04:53:00.000-08:00

Sæl
Þá er enn og aftur kominn laugardagur. Ég var að ljúka við glærurnar í fyrirlestri mínum um námsmat í stærðfræði. Ég kann hins vegar ekki að setja þær á netið. Ef einhver getur sagt mér það þá er það vel þegið. Netfang mitt er hér í bláa dálknum til vinstri.
Mér fannst gaman að vinna í power point glærunum, en það eitthvað sem ég hef gert oft. Ég er að leggja lokahönd á skrifaða fyrirlesturinn með glærunum og ætla að ljúka því dag eða á morgun. Þá er ég tilbúin í slaginn á föstudag og laugardag.
Í vikunni ætla ég að fara að byrja á lokaverkefninu. Ég hef verið að skipuleggja verkefnið og hlakka til að byrja á því. Verst finnst mér hvað tíminn er orðinn naumur, en ég reyni að nota hann eins vel og ég get. Möguleikarnir eru mikilir en tímafrekt að framkvæma þau atriði sem ég vildi helst gera. Það kemur bara í ljós hve mikinn tíma ég hef til að eyða í að gera síðuna skemmtilega.
Best að koma sér að verki.
Kveðja, Guðrún.

2003-04-01T13:35:00.000-08:00

Sæl
Nú finnst mér að vorið sé að koma. Það er bjart yfir og fuglasöngur í hverjum garði. Ég fór í gönguferð sem oftar í Elliðarárdalinn og fann fyrir vorinu.
Á ferð minni var ég að velta fyrir mér þessu námskeiði. Mér fannst á tímabili ég vera að svamla í einhverri óvissu og óvíst hvort ég næði nokkurn tímann að landi. En mér finnst ég sjá bakkann framundan og er þess fullviss að ég nái þangað í tæka tíð.
Ég hef verið að skoða lokaverkefni nemenda frá því í fyrra og lesa glærurnar hennar Þuríðar. Mér finnst spennandi tími framundan. Ég hef ákveðið mitt lokaverkefni. Það verður eins og annað efni frá mér tengt stærðfræðinni. Ég er að reyna að tileinka mér samkvæmt hugsmíðakenningunni nýja þekkingu í upplýsingatækni til að yfirfæra yfir á þá þekkingu sem ég hef sérhæft mig í. Ég hef hugsað mér að vera með lýsingu á vef um hvernig nemendur á miðstigi geta tileinkað sér ýmiss forrit í stæðrfræðinámi. Ég hef hugsað mér vefinn bæði fyrir nemendur til að vinna sjálfstætt og einnig einhverja leiðbeiningar fyrir kennara og ábendingar um hvað best er að skoða eftir efnisþáttum í kennslubókum. Ég ætla aðallega að skoða verkefni fyrir nemendur í 5. og 6. bekk sem eru með Geisla því það námsefni þekki ég vel. Ég hef í huga að skoða innlenda vefi og forrit og vefi á netinu eins og t.d.NCTM (það er vefur bandarísku stærðfræðikennarasamtakana) og vef Freudenthalstofnunarinnar. Þetta er nú allt í mótun hjá mér en ég verð að hafa hraðann á þar sem ég er að fara í próf í maí. Ég verð ekki búinn fyrr en 13. maí í síðasta prófinu og þá er orðinn lítill tími í að hanna lokaverkefni.
Læt þetta duga í bili.
Kveðja, Guðrún.

2003-03-29T03:35:00.000-08:00

Sæl
Ég átti erfitt með að horfa á eftir fjölskyldunni þar sem þau voru að fara á skíði í Bláfjöll. Ég hefi gjarnan vilja vera þar en ekki hér fyrir framan tölvuna. En framundan er mikil vinnulota þar sem ég þarf að skila tveimur verkefnum í megindlegri aðferðarfræði og gera glærufyrirlestur í Námi og kennslu. Einnig þarf ég að skila vikulega heimadæmum í stærðfræðigreinigu, verkefni í framhladsskólastærðfræðinni og nú eftir helgi þar ég að skila drögum að kennsluleiðbeiningum í Geisla 2. Ekki tími til að fara á skíði.
Ég hef verið að velta fyrir mér viðfangsefni fyrir hljóðglæruverkefni og hef ákveðið að vera með umfjöllun um námsmat í stærðfræði. Við höfundar Geisla höfum lagt áherslu á margskonar matsleiðir og höfum samið sérstök námsmatsverkefni til að styrkja þá hugsun að hægt er að meta nemendur á marga vegu. Námskrá gerir ráð fyrir því. Mér finnst þetta þarft viðfangsefni og nauðsynlegt að skapa almenna umræðu um markvissar matsleiðir í skólastarfi. Ég hlakka til að byrja að semja og gera hljóðglærur. Amelía hefur verið með þær í megindlegri aðferðarfræði og er mikið gagn af þeim.
Best að koma sér að verki.
Kveð að sinni, Guðrún.

2003-03-27T13:10:00.000-08:00

Sæl
Ég sé að það er vika síðan ég skrifaði síðast. Tíminn líður svo hratt að mér finnst alltaf vera að koma helgi. Ég fór samt inn á síðuna á þriðjudaginn og með aðstoð Krístínar Steinarsdóttur tókst mér að setja mynd á réttan stað og einnig fékk ég mér teljara. Annars hef ég verið iðin í vikunni. Fór ég í tölvutíma hjá Skarphéðni á miðvikudaginn og lærði þó nokkuð um dreamweaver. Hlakka ég til að hafa nægan tíma til að vinna betur í forritinu því það bíður upp á mjög mikla möguleika.
Ég sé fyrir mér að heimasíðugerð komi í stað saumaklúbba í framtíðinni.
Annars hef ég verið að velta fyrir mér áræðanleika og réttmæti rannsóknarinnar um netnotkun barna og ungmenna. Að vísu er rannsóknin eigindleg, en mér finnst samt allt of margir koma að rannsókninni. Ég var rétt að komast í gang þegar ég hafði tekið viðtölin. Fyrstu viðtölin voru að mér fannst ekki heldur sérstaklega góð. Það þarf að mínu mati að þjálfa upp ákveðna færni áður en lagt er af stað í viðtöl við bláókunnugt fólk. Ég held að megindleg rannsókn gefi betri mynd í þessu tilviki, en eigindleg. Spurningalisti gefur að mínu mati betri upplýsingar um netnotkun, því nemendur þurfa að hugsa sig um þar sem þeir hafa ekki verið að velta því fyrir sér fram að þessu hve mikið þeir séu á netinu.
Ég hef einnig verið að velta fyrir mér kynningunni í vetur. Hún var síðust á dagskrá eftir erfiðan dag þar sem mikið var um framandi hugtök og alveg ný viðfangsefni. Ég man ekki mikið af því sem Sólveig var að segja, því ég hafði ekki meiri orku til að taka við enn nýju viðfangsefni. Réttast hefði verið að geyma kynninguna þar til í mars, eða fram að þeim tíma þar sem rannsóknin var framkvæmd.
Annars var gaman að taka þátt. Að vísu settu veiknindi nemenda strik í reikninginn en þetta hafðist allt að lokum. Ég á að vísu eftir að fara inn á "webbinn" og koma með einhverja athugasemdir, en fyrst ætla ég að lesa meira og reyna að sjá hvort eitthvað sameiginlegt mynstur er að finna hjá krökkunum.
Læt þetta duga í bili,
kveðja Guðrún.

2003-03-20T15:30:00.000-08:00

Sæl.
Þá er enn ein vikan að verða búin. Tíminn flýgur áfram. Ég er að mestu búinn með vefleiðangurinn. Það er Þórunni að þakka, því hún kenndi mér hvernig hægt er að fara upp og niður á sömu síðu. Þökk fyrir það Þórunn. Slóðin er Vefleiðangur í stærðfræði
Mér hefur ekki tekist að ljúka við verkefni 3 hjá Láru en er búin að fara í vettvangsrannsókn. Ég á eftir að skrá svörinn inn á vefinn hennar Sólveigar. Ég ætla að reyna að ljúka þessu um helgina. Er Láru hluti ekki búinn á laugardaginn?
Kveð að sinni, Guðrún.

2003-03-18T14:44:00.000-08:00

Sæl
Loks hefur mér tekist að tengja ensku síðuna inn í vefinn. Ég færði allar tengingar í eina möppu og hef síðan átt í hinu mesta basli við að tengja síðurnar. En smá saman er ég að læra hvað best er að gera. Hér eru tengingin á íslenska textann og á enska textann.
Í gær fór ég í skólaheimsókn og gerði rannsókn á tveimur nemendum í tölvutíma. Á morgun ætla ég síðan að bæta tveimur öðrum nemendum við. Það var skemmtilegt að fylgjast með nemendunum. Þegar ég er sjálf að kenna þá er ég alltaf svo upptekin og gleymi því oft að staldra við og horfa yfir bekkinn til að meta andrúmsloftið og skoða hvað er að gerast í skólastofunni. Nú hafði ég gott tækifæri til þess og gaman var að fylgjast með.
Kveð að sinni, Guðrún.

2003-03-16T16:20:00.000-08:00

Sæl
Ég hef lokið við að vinna síðu um UT og kennslu en á eins og venjulega í vandræðum með að koma síðunni inn á vefinn. Ég veit í rauninni ekki hvers vegna mér tekst það stundum en ekki alltaf. Í raun kann ég ekkert og er að þreifa mig áfram með misjöfnum árangri. Á heimasíðu minni er linkur inn á þetta verkefni sem vonandi virkar einhvern tímannn.
Kveðja Guðrún.

2003-03-12T15:25:00.000-08:00

Sæl.
Á UT fór ég á stórskemmtilegan fyrirlestur sem Ármann Halldórsson hélt og fjallaði um netlist fyrir kennara. Einnig fór ég á málstofur sem Hólmfríður Sigurþórsdóttir hafði umsjón með og var umræðuefnið vefleiðangur í vistfræði. Þar kynnti hún vefleiðangra sem hún notar í kennslu í Fjölbrautaskóla Garðarbæjar.
Á laugardagsmorgun fór ég á fyrirlestra nafnanna Guðmundar Kristjáns Óskarssonar og Guðmundar Birgissonar. Guðmundur Kristján sagði frá reynslu sinni í fjarkennslu í Hagnýtri stærðfræði við Háskólann á Akureyri. Hann lýsti fjarkennslubúnaði og námsumhverfi WebCT. Það er hins vegar fyrirlestur Guðmundar Birgissonar sem mér fannst athyglisverður.
Hann var með hugleiðingar um áhrif þróunarverkefna. Hann nefndi fyrirlesturinn:
Er hægt að læra af reynslu annarra?
Hann fjallaði þar um að almennt getum við sagt að við viljum geta lært af því sem aðrir hafa gert vel. Hins vegar hafa þróunarverkefni haft lítil áhrif á aðra en þá sem taka þátt í þeim. Hvers vegna?
Við höfum lesið reynslusögur og hafa þær haft mismunandi áhrif og fer það aðallega eftir því hvernig við túlkum þær. Margar rannsóknir hafa verið gerðar með það að leiðarljósi að skoða og greina kennarann, hlutverk hans og áhrif. Einnig hafa rannsóknir verið gerðar til að reyna að lýsa því hvernig nám fer fram. Skólaumhverfi og námsefni hafa verið skoðuð með það að leiðarljósi að hafa sem best áhrif á nám.
Niðurstaða Guðmundar af því hvers vegna þróunarverkefni hafa ekki meiri áhrif á aðra en þá sem taka þátt í því var:
• að ekki er hægt að nýta sér reynslu annarra án þess að hafa öðlast skilning á eigin kennslu
• kennari þarf að finna fyrir þörf á að læra meira um reynslu annarra ef hann ætlar að tileinka sér hana
• áhuginn þarf að koma frá kennaranum sjálfum

Guðmundur benti á lesefni, Mason,J: Researching Your Own og Prectice: The Discipline of Noticing. Mér fannst þetta mjög áhugavert umhugsunarefni og hefði viljað skoðað þetta sjónarmið í umræðum og virkri þátttöku. Hins vegar fannst flestum sem voru þarna viðstaddir áhugaverðara að ræða almennt um fjarnám og reynslu þess í stærðfræðinámi. Flestar fyrirspurnir voru því til Guðmundar Óskarssonar. Það var að mínu mati ókostur að hafa þessa fyrirlestra saman því þetta voru svo ólík viðfangsefni, þó báðir séu að kenna stærðfræði á háskólastigi.

2003-03-11T14:52:00.000-08:00

Sæl.
Fyrri fyrirlestur sem ég ætla að segja frá var á laugardeginum milli 14:00 – 14:50.
Þátttakendur voru Allyson Macdonald, Torfi Hjartarson, Þuríður Jóhannsdóttir, Kristín Guðmundsdóttir og Sigurjón Mýrdal.
Fyrirlesturinn hét NámUST rannsóknin: UST á vettvangi náms.
NámUST er rannsóknarverkefni sem KHÍ, Háskólinn á Akureyri og Háskólinn í Reykjavík eiga aðild að og er verkefni um notkun upplýsinga- og samskiptatækni sem miðils í námi og kennslu.

Fyrirlesarar vilja skoða möguleika sem notkun upplýsingatækni sem miðils opnar fyrir nám og kennslu, en til að ná þeim tilgangi er þörf á að vita meira um hvað slíkt nám felur í sér og hver sé þekkingarlegur ávinningu af að taka slíkt nám upp.
Þau kynntu rannsókn sem leitast við að varpa ljósi á hvað upplýsinga- og samskiptatækni (UST) hefur í för með sér fyrir grunnskóla og kennaramenntun. Þau hafa reynt að skilgreina hvað notkun UST hefur í för með sér fyrir skóla sem stofnanir, þ.e.hvernig grunnskólar og kennaramenntun hafa brugðist við kröfum um nýtingu UST m.a. í námskrá. Þau hafa skilgreint þau öfl sem koma að UST og fjalla um að almennt sé mikil hvatning meðal ríkisvalds og sveitafélaga. Það koma fram skýr markmið í skólanámskrá og skólastjórar og tölvuumsjónarmenn hafa mikinn áhuga á að efla tölvukennslu og safnkennslu. Hins vegar er óljóst hve margir kennarar séu virkir og töldu þau að flestir væru í nokkurri óvissu um hvort efla bæri notkun UST í skólastarfi.
Þau töldu að almenn væri skólinn sem stofnun að reyna að hafa áhrif á kennara og vildu stjórnvöld og sveitastjórnir efla jákvætt viðhorf og gott aðgengi að tölvukennslu. Þau telja hins vegar að það þurfi að hyggja að áhuga, færni, frumkvæði, þjálfun, skipulagi, sveiganleika, samstarfi og aðgengi kennarana. Þau lögðu áherslu á að það þurfi að skapa heildarsýn yfir notkun UST og hvetja alla innan veggja skólans til að vera virka.
Í lokin var lítillega fjallað um áhrif hinna miklu tæknibreytingar á þjóðlífið almennt og í því samhengi rakin saga upplýsingatækninnar síðastliðinn 10 ár frá fyrstu tölvukennslu Péturs á Kópaskeri til farsíma, myndsíma, fjarfundabúnaðar, veraldarvefsins myndsíma og fleiri búnaða sem við höfum í dag.
Þetta var mjög áhugaverður fyrirlestur, en því miður var lítill tími fyrir umræður. Þetta umfjöllunarefni hefði þurft milku meiri tíma. Ég hefði vel getað hugsað mér að eyða heilum degi í svona áhugavert og yfirgripsmikið málefni. Bent skal á skýrslu sem þau hafa gefið út og nefnist hún námUST
Kveð að sinni, Guðrún

2003-03-06T16:12:00.000-08:00

Sæl.
Ég hef átt annríkt þessa viku. Þegar ég kom frá Akureyri var fyrri afmælisveisla sonar mína að síga á seinni hlutann. Daginn eftir var bekkjarafmæli og því þurfti ég að baka aftur fyrir það á laugardagsdvöldið. Það var í raun heppilegt að afmælið bar upp á bolluvertíð en við þjófstörtuðum bolludegi þessa afmælisdaga.
Þegar kom að bolludegi var ég sest við próflestur, en á þriðjudaginn var misvetrarpróf í stærðfræðigreiningu í HÍ. Nú þegar ég kom heim úr prófinu byrjaði ég að undirbúa fyrirlestur sem ég hélt í gær. Því hef ég ekki haft mikinn tíma aflögu við skriftir. Það var svo í dag sem ég gat farið að fikta í dreamweaver og með aðstoð kærasta dóttur minnar tókst okkur loks að flytja vefleiðangur og vefrallý fyrir framhaldsskóla inn á vefsíðu mína. Ég á eftir að ljúka við vefleiðangurinn, laga hann og bæta. Það mun ég gera um helgina.
Ég er mjög ánægð með ráðstefnuna á Akureyri. Lærði ég margt þar. Ég hef ákveðið að skrifa um fyrirlestra sem nafnarnir Guðmundur Óskarsson og Guðmundur Birgisson héldu á laugardagsmorgun og um NámUST sem var eftir hádegi á laugardaginn. Það mun ég gera í næstu viku.
Kveð að sinni, Guðrún.

2003-02-23T08:15:00.000-08:00

Sæl.
Ég hef í dag verið að vinna í heimasíðu minni og tekist að uppfæra hana. Hér er krækja í hana. Ég hef verið að reyna að gera gagnsæja töfluna í síðunni Hver er ég án árangurs og ef einhver getur sagt mér hvað ég á að gera til að fá töfluna gegnsæja þá er ég mjög þakklát. Nú ætla ég að fara að vinna vefleiðangurinn og vonandi verður hann búinn um næstu helgi.
Kveð að sinni, Guðrún

2003-02-20T15:26:00.000-08:00

Sæl
Ég hef tekið eftir því að myndirnar sem ég var með eru farnar út úr dagbókinni. Ætla að setja nýjar um helgina. Ég er að vinna í fjölskylduvefnum og hefur það gengið erfiðlega. Mér gegnur einnig illa með tengingu við vefsíðuna og veit ekki almennilega hvað ég er að gera. Ég mun fara í aukatíma á þriðjudaginn sem Þórunn hefur af dugnaði skipulagr fyrir okkur. Hlakka ég til að geta spurt einhvern ráða.
Kveð að sinni, Guðrún.

2003-02-17T01:57:00.000-08:00

Sæl
Ég hef verið að vinna með myndir um helgina fyrir kynningu á fjölskyldunni og ætla að reyna að ljúka því í vikunni. Ég er að hugsa um að hafa kynningu á fjölskyldunni á síðunni "Hver er ég" ásamt tæknisögu og kynningu á mér. Ég stefni að því að ljúka þessu fyrir vikulok.
Þessi helgi var viðburðarrík. Í gær var frumsýninga á Herranótt, en dóttir mín Harpa er að leika í leikritinu. Leikritið heitir Hundshjartað og er eftir Mikhail Búlgakov í þýðingu og leikstjórn Ólafs Egils Egilssonar. Ég hef farið á nokkrar uppfærslur á Herranótt og alltaf haft gaman af sýningunum. Logi elsti sonur minn var þrjú ár í röð í leikritum og er þetta annað ár Hörpu. Fyrsta hlutverk Loga í Herranótt var leikritið Baal, en þar lék Ólafur Egill aðalhlutverkið og vann mikinn leiksigur. Það sem mér finnst skemmtilegast við þessar uppfærslur er hvað oft eru fundnar einfaldar lausnir á flóknum sviðsmyndum. Allir leikarar standa sig með mikilli prýði og er hópurinn á sviðinu einstaklega samhentur. Krakkarnir leggja líf sitt og sál í verkið og hafa unnið hörðum höndum í margar vikur við að koma þessu verki upp. Verkefnaval finnst mér í gegnum tíðina hafa verið mjög fjölbreytt. Verkið í fyrra er t.d. gjörólíkt því í ár og er vonlaust að bera þessi verk saman.
Læt þetta duga að sinni, kveðja Guðrún.

2003-02-13T07:28:00.000-08:00

Sæl
Ég hef verið að skipuleggja vefleiðangur þessa vikuna og ætla ég að koma honum áleiðis næstu daga. Ég hef ákveðið að vera með leiðangur í stærðfræði. Ætla ég að skipuleggja vefleiðangurinn þannig að nemendur skilgreini ákveðin grunnhugtök stærðfræinnar og eiga þeir að nota stafrænar myndavélar til að hjálpa til við að lýsa viðfangsefninu, en jafnframt þúrfa þeir að leita að upplýsingum um hugtökin á netinu. Þeir eiga að skila verkefninu með veggspjali og kynningu. Markmið leiðangursins er fyrst og fremst að kenna nemendur að leita að upplýsingum á vefnum, en auk þess læra þeir sjónrænt að skilgreina hugtökin. Ég hef áður unnið með líkt verkefni og gekk það mjög vel. Nemendum fannst mjög gaman að fá að kynnast stafrænni myndavél og lærðu að framkalla og prenta út myndir gegnum tölvuna. Þá fékk ég til liðs við mig tölvukennara skólans, sem hjálpaði krökkunum að prenta út myndirnar.
Ég sé að flestir á námskeiðinu hennar Salvarar eru komnir með skilaboðaskjóðu og teljara. Glæsilegt hjá ykkur.
Kveðja, Guðrún.

2003-02-10T16:17:00.000-08:00

Sæl.
Það var skemmtilegur tími á laugardaginn og verð ég einnig að hrósa glósunum sem við fengum sendar um fireworks. Nú er ég að prufa mig áfram í að klippa og laga til myndir af fjölskyldumeðlimum, sem ég ætla að setja inn á heimasíðuna mína seinna í mánuðinum.
Annars hefur flensa herjað á okkur hér á bæ og því hef ég ekki verið dugleg í augnablikinu en horfi fram á næstu helgi.
Ég hef verið að skoða vefrallýverkefnin og hef í því sambandi verið að velta fyrir mér hvort þau séu almennt ekki of stýrandi. Ef markmiðið er að fá nemendur til að kynnast ákveðnum vefum þá held ég að spurningarnar þurfi að vera þannig að nemendur séu eitthvað að tjá sig en ekki einungis að klippa og líma inn svör.
Markmiðið hlýtur að vera að fá þau til að kynnast spennandi vefum með því að þau velti fyrir sér innihaldinu. Þetta eru vangaveltur sem ég var að ræða við Kolbrúnu Hjaltadóttur í gönguferð um helgina og var hún sammála mér.
Spennandi væri því að gera verkefni þar sem nemendur þurfa að verta vöngum og svara út frá eigin brjósti með því að skrifa stutta lýsingu eða búa sjálf til spurningar. Þetta hafði ég að leiðarljósi þegar ég samdi mitt rallý, en hafði jafnframt hefðbundnar klippa - líma spurningar með.
Kveðja, Guðrún.

2003-02-07T16:45:00.000-08:00

Sæl.
Það er víst óhætt að segja að tíminn fljúgi "hratt á gerfihnattaröld", komin helgi og vikan sem byrjaði í "gær" búin á morgun.

Ég hef verið að velta því fyrir mér í vikunni hvers vegna kennarar nota ekki forrit til að létta sér að búa til, ljósrita og fara yfir ýmsar
þjálfunaræfingar í kennslu. Ég var með fræðslufund um stærðfræðinám á þriðjudaginn, þar sem ég var meðal annars að kynna nýtt námsefni, en með því fylja forrit sem hugsuð eru til að þjálfa nemendur í grunnatriðum stærðfræðinnar. Kennararnir þekktu ekki forritin, höfðu ekki farið með nemendur sína í þau, né bent þeim á að þeir gætu komist sjálfir í þau heima hjá sér á netinu.

Ég hugsa að margir þættir hafi áhrif á að almennt fari kennarar ekki í þessi forrit. Tímaleysi held ég að sé samt aðaláhrifaþátturinn, en einnig finnst mér bókin oft sjórna náminu í kennslustofunni frekar en námskráin. Kennarar eru finnst mér einnig uppteknir af alls konar fundum sem mér finnst oft þarflausir í skólastarfinu og sem ekki skila neinum árangri í starfi. Mér finnst að það mætti t.d. fækka almennum kennarafundum, en nota þann tíma sem sparast í að leyfa kennurunum að prófa ýmiss þau forrit sem nú þegar eru til í flestum skólum og sem eru á netinu. Vinnuálag á kennara hefur aukist mikið síðustu ár og því er eðlilegt að þeir vilji ekki bæta þessarri leið í kennslu á allt sem fyrir er, þar sem þeir hafa ekki kynnst tímasparnaðinum sem fylgir því að notast við þessa tækni.
Tækniþróunin hefur verið svo ör undanfarið að það þarf að halda fleiri og fjölbreyttari endurmenntunarnámskeið fyrir kennara, þar sem þeir geta valið hvað þeir vilja bæta við þekkingu sína í stað þess að halda sama námskeið fyrir alla kennara skólans.
Ég er sannfærð um að tölvutæknin komi til með að hafa áhrif á menntun í framtíðinni. Möguleikar til menntunar hafa breyst og erum við á þessu námskeiði sönnun þess.

Jæja, læt þessum hugleiðingum lokið í bili. Hlakka til að mæta á morgun í KHÍ.
Kveðja, Guðrún.

2003-02-01T16:07:00.000-08:00

Sæl.
Loksins tókst mér að tengja heimasíðuna. Vefslóðin er http://www.ismennt.is/not/gan
Ekki kann ég enn að uppfæra vefinn, en ætla að taka mér frí á morgun áður en ég fer að lesa mér til um það.
Annars hefur þetta verið mjög skemmtilegt og hlakka ég til að læra meira.
Kveðja Guðrún

2003-01-30T16:10:00.000-08:00

Sæl.
Ég er búin að sitja við tölvuna allan gærdag, langt fram á nótt og í dag. Við Kristín Steinarsdóttir hittumst í gærmorgun og prófuðum okkur áfram. Þegar ég kom heim settist í niður og lauk við að hanna vefrallýið. En ekki gekk allt sem skyldi. Vandræði mín eru að ég get ekki tengt síðuna mína. Ég er búin að fá lykilorð og vefurinn er kominn inn á svæðið, en hann birtist ekki á netfanginu. Ég held ég sé búin að reyna að fikta í öllum tökkum og búin að lesa kennslubrétið Tengja saman heimasvæði og heimatölvu "spjaldanna á milli". Ég kann það bráðum utanbókar, en án árangurs. Ég hef einnig reynt störunaraðferð en því miður virkar hún ekki. Kærasti dóttur minnar kom í heimsókn og saman reyndum við að "fikta" okkur áfram án árangurs. Ég er því búin að gefast upp og lýsi eftir einhverjum sem getur sagt mér hvað er að. Netfang mitt er gan@ismennt.is.
Mér fannst mér mjög skemmtilegt að hanna vefrallýið. Ég valdi vefinn Íslandsvef sem Námsgagnastofnun hefur sett upp á heimasíðu sinni. Hann er mjög áhugaverður og getur nýst vel í samfélagsfræði á miðstigi.
Kveðja, Guðrún

2003-01-26T03:46:00.000-08:00

Ég hef í gegnum tíðinna verið klaufi í samskiptum mínum við tölvuna og hafa aðrir fjölskyldumeðlimir oft hlegið að vandræðum mínum þegar ég hef reynt að nýta mér þetta undratæki. Smátt og smátt hef ég lært ýmislegt og tel nauðsynlegt að nota þessa tækni þar sem hún er komin til að vera og býr yfir möguleikum sem vert er að taka í sína þjónustu. Ég tel að tölvur séu enn eitt hjálpartæki okkar kennaranna og opnar nýjar leiðir í kennslu. Helstu möguleika sé ég í að hjálpa nemendum okkar í þekkingarleitinni, þar sem samfélag okkar er ört að breytast í þekkingarsamfélag.
Fram á þennan dag hefur tæknin alltaf verið nokkrum skrefum á undan okkur. Við höfum því þurft að hafa nokkuð fyrir því að komast yfir nægilega þekkingu og geta notfært okkur hana, en hún er komin til að vera og því best að tileinka sér hana eins fljótt og auðið er.

Framtíð tölvunotkunar í kennslu tel ég bjarta, en við verðum einnig að vera á varðbergi. Nemendur í dag líta á tölvuna meira sem afþreyingu en kennslutæki og eru fljótir að fara á spjallrásir og í ferðalög um heiminn á netinu í kennslunni þ.e.a.s. ef þeir komast upp með það. Því er mikilvægt að verkefnin höfði til þeirra og þeir hafi stuttan, skipulagðan tíma til að vinna þau verkefni sem þeim er sett fyrir. Hér tala ég af reynslunni þar sem ég hef verið að þreifa mig áfram með að verkefnavinnu í tölvu með unglingum. Ég hef einnig heyrt ýmsar frásagnir hjá samkennurum. Ég held hins vegar að þetta vandamál sé ekki komið til með að vera ef verkefnin eru vönduð og tíminn vel skipulagður.
Við verðum að vera vakandi fyrir því að það er til mikið af slæmum verkefnum á netinu og jafnframt þurfum við að hafa dómgreind til að hafna slíkum verkefnum.
Í dag eru kennarar almennt mjög bundnir kennslubókum, en ég tel að þeir komi til með að losa sig að einhverju leyti við þau bönd og snúa sér að meiri vinnu með tölvur, kannski vinna meira einhvers konar þjálfunarverkefni í tölvu. Hins vegar finnst mér ólíklegt að tölvur komi í stað fyrir grunnþjálfun í t.d. skrift og myndlist hjá nemendum. Þeir koma alltaf til með að þurfa að beita hug og hönd í framtíðinni. Það þarf að vera umræða um, að kannski geta tölvur í skólastarfi dregið úr sköpunargleði nemenda. Þeir eiga svo auðvelt með að sækja sér alls konar myndefni og geta valið úr mismunandi letri við skil á verkefnum, sem þau geta ekki gert betur með eigin höndum.

Ég hef farið með nemendur mína í ýmiss forrit þá aðallega tengd stærðfræði. Ég hef einnig kennt þeim að leita að upplýsingum á vefnum. Auk forrita hafa þeir fengið verkefni við að útskýra hugtök í stærðfræði með því að afla sér upplýsinga á vefnum og taka ljósmyndir sem lýsa stærðfræðihugtökunum á tövlumyndavél, sem þeir hafa sett á plaköt og kynnt. Síðastliðinn vetur héldu umsjónarnemendur mínir bekkjarblað, sem þeir unnu aðallega í publiser. Ég verð að viðurkenna að nemendur mínir hafa kennt mér meira en ég þeim í gegnum árin. Margir kunna ótrúlega mikið miðað við ungan aldur. Fyrir nokkrum árum fór ég með 10. bekk, 26 nemendur í tölvustofuna til að vinna verkefni í exel. Þetta var í fyrsta sinn sem ég fór með unglinga í tölvustofu en ég hafði þá talsverða reynslu í að fara með yngsra stigs nemendur í tölvustofu. Í stuttu máli get ég sagt að annan eins tíma hef ég aldrei upplífað. Hann var gjörsamlega mislukkaður, en mér tókst að vikja nokkra nemendur sem hjálpuðu mér fyrir horn og björguðu starfsheiðri mínum. Hef ég oft helgið að þessari uppákomu. Stundum er betra að stökkva af stað en sitja og gera ekki neitt. Hvað þennan tíma varðar tókst nokkrum nemendur samt sem áður að læra á forritið og ljúka við verkefnið og hélt ég þá, að ég færi ekki aftur með 26 nemendur í einu í tölvustofu í forrit sem fáir kunna á. Sú spá rættist ekki sem betur fer og hef ég síðustu ár farið nokkuð oft með stóra hópa af unglingum í ýmiss verkefni í tölvustofu. Hefur mér gengið betur enda er til skjávarpi sem auðveldar mjög kennsluna.

Hvað tölvunotkun mína varðar þá hef ég mest unnið í forritunum word, exel og power point og þá aðallega eitthvað tengt skólanum eða stærðfræðinámi mínu, eins og t.d. búið til námsefni, próf og skýrslur. Einn vef hef ég átt þátt í að búa til í framhaldsnámi mínu í stærðfræði sem nefnist Hvað er stærðfræði
Til gamans má geta þess að þegar við unnum Geisla 1, ég, Guðbjörg og Jónína, þá bjuggu þær báðar í útlöndum, Guðbjörg í Malaví og Jónína í Brussel. Sendum við handritin á milli okkar í tölvupósti. Ég nota daglega tölvupóst við vinnu og einnig á ég son í Ameríku sem hefur samband við okkur í gegnum tölvupóst, en við tölum einnig vikulega saman gegnum tölvuna með intel netmeeting hugbúnaði.

Fyrsta tölvan kom á heimili mitt þegar eldri sonur minn, Logi var 10 ára árið 1987. Hann heillaðist strax af möguleikum hugbúnaðarins og fékk samdægurs tölvubakteríuna. Nú er hann í doktorsnámi í Stanford í U.S.A í tölvu- og rafmagnsverkfræði. Framtíð hans liggur því sennilega á breiðum en hlikkjóttum vegi tölvutækninnar við áframhaldandi vinnu að hugbúnaðargerð.

Yngri sonur minn Orri lærði að kveikja á tölvu áður en hann fór að ganga og sóttist hann eftir því að komast í þau herbergi þar sem tölvu var að finna. Kveikti hann þá á tækjunum og hreinsa út hin ýmsu forrit. Hann hefur einnig sýkst af bakteríunni þó hann sé aðeins 8 ára og kann ýmislegt sem móðir hans getur ekki. Því er oft kallað á hann, til að fá aðstoð. Framtíð hans er hins vegar enn óráðinn og þurfum við sennilega að bíða í nokkur ár eftir að fá að vita hvað hún ber í skauti sér.

Dætur mínar tvær Hildur Ýr og Harpa hafa hins vegar ekki setið eins mikið við tölvuna og bræður þeirra. Þær nota hins vegar tölvu daglega í framhaldsskólanámi sínu. Þegar þær halda fyrirlestra nota þær yfirleitt power point glærur og best finnst þeim að safna upplýsingum á netinu. Þær fara ekki oft með fartölvu með sér sér í skólann (MR), en þær hafa fengið þar ágætis tölvukennslu. Þær hafa meðal annars lært um meðferð texta og talna í tölvum, Boolean algebru og rökrásir, tölvur og vélbúnað, ritvinnslu og töflureikni. Í Ölduselsskóla lærðu þær að búa til heimasíðu og að safna upplýsingum og skrifa ritgerðir í tölvu.

Á heimilinu eru til tvær fartölvur og þrjár borðtölvur. Mín tölva er ný fartölva Toshiba sem ég fjárfesti fyrir jólin og er ætluð í nám mitt og kennslu. Hin fartölvan tilheyrir eiginmanninum, en hann notar daglega tölvu við störf sín í Háskóla Íslands. Við erum með ISDN símatengingu og eiga dætur mínar og elsti sonur GSM farsíma. Við gamla settið ég og maður minn, Viðar Már höfum hins vegar engan áhuga á að eignast slíka síma. Hann á hins vegar gamlan Benefon MNT síma sem alltaf er ofan í skúffu nema þegar við förum í gönguferðir á fjöll eða vestur í Ármúla í Ísafjarðardjúpi. Sjónvarp horfum við lítið á, höfum ekki stöð 2 en fáum okkur stundum myndband um helgar. Mest höldum við upp á evrópskar myndir, en því miður er of lítið af þeim á markaðnum.

2003-01-23T07:30:00.000-08:00

Sæl
Ég sá á póstlista Salvörar að nafn mitt var ekki á listanum, en mér virðist að ég sé inni í blogger.com
Ég er nýliði í upplýsingatækninámi og því nokkuð klaufaleg. Vonandi kemur þekking mín á tækninni með þjálfun. "Æfingin skapar meistarann", segir máltakið.
Í vetur hef ég verið í námsleyfi, en ég er grunnskólakennari í Lindaskóla og hef síðustu ár aðallega kennt á unglingastigi stærðfræði og íslensku.
Ég hef undanfarin ár verið mikið að fást við stærðfræði bæði sem nemandi og námsefnishöfundur. Ég hef útskrifast úr 30 eininga stærðfræðinámi sem KHÍ, HÍ og HA skipulögðu, en því lauk fyrir ári. Í vetur hef ég síðan verið í stærðfræði í HÍ og einnig í framhaldsdeildinni í KHÍ.
Ég hef ásamt Guðbjörgu Pálsdóttur og Jónínu Völu Kristinsdóttir samið stærðfræði fyrir 5. námsár sem heitir Geisli 1. Í vetur höfum við ásamt Guðnýju Helgu Gunnarsdóttir verið að semja Geisla 2 sem kemur út næsta haust.

Um hlegina ætla ég að reyna að setja mynd af mér á blogger.com.
Kveðja Guðrún.

2003-01-15T06:39:00.000-08:00

Sæl. Nú er ég í tíma hjá Salvöru.
Við erum að læra á blogg.
Þetta hefur verið skemmtulegur tími og á þessu námskeiði hefur opnast nýr heimur fyrir mér.
Það er alveg ótrúlegt hvað hægt er að gera margt skemmtilegt.
Kveðja Guðrún.